సాంస్కృతిక బందనాలు కుటుంబం..బంధం

👉సాంస్కృతిక బందనాలు
కుటుంబం..బంధం
-----------------------------------
తండ్రికొడుకులిద్దరు కలిసి నడుస్తున్నారు.
"నాన్నా! మన సంస్కృతి, నమ్మకాలు మనం మరింత అభివృద్ధి చెందకుండా ఆపుతున్నాయి కదూ!" అడిగాడు కొడుకు.
తండ్రి చిరునవ్వు నవ్వాడు.
"చెప్పు నాన్నా! మనం పల్లెటూరిలో పుట్టడం, మన భాష , మన రిలేషన్స్ ఇవన్ని మనం మరింతగా అభివృద్ధి చెందకుండా ఆపుతున్నాయి కదూ!"
తండ్రి మళ్లి చిరునవ్వు నవ్వాడు.
కొంత దూరం వెళ్లిన తరువాత తండ్రి ఒక గాలిపటాన్ని కొని ఎగరవేయసాగాడు .
అతని కుమారుడు జాగ్రత్తగా తండ్రి గాలిపటాన్ని ఎగరవేయడాన్ని గమనిస్తున్నాడు.
కొంత సేపు గమనించిన తరువాత కొడుకు "నాన్నా! గాలిపటానికి కట్టిన తాడు వల్లనే అది మరింత పైకి ఎగరలేక పోతుంది కదూ! ఆ తాడు గాలిపటాన్ని అదుపు చేస్తుంది." అన్నాడు.
ఆ మాటలు విన్న తండ్రి నవ్వుతూ తాడును తెంపివేశాడు.
తాడును తెంపి వేయగానే ఆ గాలిపటం ఒక్కసారిగా పైకి ఎగిరి వెంటనే క్రిందికి పడిపోయి ఒక చెట్టుకు చిక్కుకుని చినిగిపోయింది.
అది చూసి కొడుకు బాగా నిరుత్సాహ పడుతూ ఎడుపు ముఖం పెట్టాడు.
తండ్రి తన కొడుకును ఒడిలో కూర్చోబెట్టుకుని నుదుటిపై ముద్దిడి ప్రశాంతంగా ఇలా వివరించాడు.
" నాని! ఆ గాలిపటంలాగే మనం కూడా ఒక స్థాయి వరకు ఎదుగుతాము.ఆ తరువాత మరింతగా ఎదగడానికి మన ఇల్లు, కుటుంబం, సంస్కృతి, భాష , ఊరు మొ॥అడ్డు వచ్చి మనను ఎదగనీయకుండా చేస్తున్నాయని భావిస్తాము. అప్పుడు ఈ బంధనాలు తొలిగిపోతే ఎంత బావుండు! అనుకుంటాము.
కాని, గాలిపటం ఎత్తులో స్థిరంగా ఉండడానికి తాడు సహాయపడినట్లు, మనం బంధనాలు అనుకుంటున్న ఇల్లు, కుటుంబం, సంస్కృతి, భాష, ఊరు మొ॥వి..నిజానికి మనం .. పైస్థాయిలో స్థిరంగా ఉండే విధంగా సహాయపడుతున్నాయి.
ఒకవేళ ఈ బంధనాలు తొలగించుకుని దూరంగా వెళితే మన పరిస్థితి కూడ తాడు తెగిన గాలిపటంలా తయారౌతుంది. చివరకు ఎదిగిన స్థాయి నుండి కూడా క్రిందకి పడిపోతాము.
కాబట్టి నా చిట్టి తండ్రీ!
మనం ఇంటిని బంధనం అనుకోవద్దు!
కుటుంబాన్ని బంధనమని అనుకోవద్దు!
సంస్కృతినీ, మాతృభాషను బంధనమని అనుకోవద్దు!
మన పల్లెటూరు ను బంధనమని అనుకోవద్దు!
మన రిలేషన్స్ ను బంధనమని అనుకోవద్దు!
గాలిపటానికి కట్టిన తాడు లాగే ఇవన్ని బంధనాలు కావు నాయనా! బలాలు " అన్నాడు తండ్రి ...............